Внимание! Сайт работает в тестовом режиме!
РАДИО – 107,4 FM –

Стагоддзе з дня нараджэння Пятра Машэрава адзначылі ў Вілейцы

Цікавае мерапрыемства прайшло нядаўна ў цэнтры эстэтычнага выхавання – з нагоды дзвюх важных для ўсіх нас дат тут зладзілі сустрэчу-успамін, сустрэчу-экскурс у гісторыю і для многіх сустрэчу-адкрыццё. Якія ж гэта даты? Васьмідзесяцігоддзе Мінскай вобласці, якое ўрачыста адзначалася, і стагоддзе з дня нараджэння Пятра Машэрава, Героя Савецкага Саюза, Героя Сацыялістычнай Працы, партыйнага і дзяржаўнага дзеяча Беларусі.

Да Вілейшчыны ў Пятра Міронавіча былі асаблівыя адносіны, бо ў 1944-45 гадах ён тут жыў і працаваў. Тут, у Вілейцы, быў зарэгістраваны яго шлюб з Палінай Галанавай, тут нарадзілася іх дачка… Таму віляйчане заўсёды былі для яго, бадай што, землякамі.

Дзве гэтыя юбілейныя даты былі ўдала аб’яднаны ў сцэнарыі мерапрыемства «Беларусь у лёсах людзей», якое распачалося ля мемарыяльнай дошкі Пятру Міронавічу Машэраву, што была адкрыта дзесяць гадоў таму назад на будынку па вуліцы Партызанскай. дзе ў свой час ён працаваў. Прыемна, што ўдзельнікамі сустрэчы былі хлопцы і дзяўчаты з вілейскага дзяржаўнага каледжа, якім, безумоўна, было цікава пачуць расказы дырэктара цэнтра эстэтычнага выхавання Таццяны Захарыч, старшыні раённага савета ветэранаў Ганны Шэпелевай. старшага навуковага супрацоўніка гісторыка-краязнаўчага музея Вольгі Коласавай. З удзячнасцю маладыя людзі ўсклалі да дошкі вядомага чалавека кветкі.

А затым мерапрыемства прадоўжылася ва ўтульнай зале цэнтра эстэтычнага выхавання. Тут гучалі беларускае слова і песня (за яе дзякуй артыстцы Марыне Заяц), дэманстраваліся прэзентацыя «Мая Міншчына» (пад цудоўныя песні калектыву аўтарскай песні «Элегія» на экране «гарталіся» такія ж цудоўныя слайды знаёмых месцаў Міншчыны) і фільм пра Пятра Машэрава «Палёт душы», створаны дзесяць гадоў таму назад. Што і казаць, усё гэта ўразіла, усхвалявала і нават расчуліла. Ды і было ад чаго…

Таццяна Захарыч цікава расказала пра тое, якім было святкаванне юбілейнай даты сталічнай вобласці. У гэтай урачыстасці прымала ўдзел і вілейская дэлегацыя, і наша газета расказвала пра гэта ў папярэднім нумары.

Хвалюючай і цікавай была размова пра Пятра Машэрава. Сваімі ўспамінамі пра яго падзялілася Ганна Шэпелева, бацька якой у ваенныя гады разам з Пятром Міронавічам быў у камсамольскім падполлі. Неабыякавасць, прастата, чалавечнасць – гэтыя рысы, адзначалася на сустрэчы, былі характэрна Машэрава на працягу ўсяго яго жыцця.

Я ўпэўнена, што ўсе прысутныя значна папоўнілі свае веды пра Беларусь і яе людзей за час гэтай сустрэчы. Цікавымі гістарычнымі звесткамі падзялілася і Вольга Коласава. Яна таксама нагадала, што зараз у музеі працуе выстава «Міншчына – сэрца Беларусі», якая расказвае пра вельмі многае.
«Міншчына наша – край роднае мовы, вершы Купалы і Коласа словы»… Гэтыя словы з песні «Элегіі» наплывалі і наплывалі яшчэ доўга пасля сустрэчы. І гучала цудоўная музыка, якая хвалявала і натхняла, перапаўняла гонарам за наш край і яго людзей,

Ірына БУДЗЬКО.
Фота Аляксей КАМІНСКАГА

Добавить комментарий

Ваш e-mail не будет опубликован.


Яндекс.Метрика